එක්සත් ජනපද පාලනය සැමවිටම රුසියානු විරෝධී න්‍යාය පත්‍රයක් අඛණ්ඩව පවත්වාගෙන යන බැවින්, මෙවර ඇමරිකානු ජනාධිපතිවරණයෙන් ජයග්‍රහණය කළ ඩොනල්ඩ් ට්‍රම්ප් මහතා සම්බන්ධයෙන් ද මොස්කව් පාලනයට කිසිදු වෙනස් අදහසක් නොමැති බව රුසියානු විදේශ අමාත්‍යාංශය ප්‍රකාශ කර ඇත. නිවේදනයක් නිකුත් කරමින් රුසියානු විදේශ අමාත්‍යාංශය අවධාරණය කර ඇත්තේ, තේරී පත් වූ ඇමරිකානු ජනාධිපතිවරයා සහ කොන්ග්‍රසයේ නව සංයුතිය පිළිබඳව ඔවුන්ට කිසිදු මිත්‍යා අදහසක් නොමැති බවයි.
එක්සත් ජනපද පාලනය සැමවිටම පක්ෂ භේදයකින් තොරව, රුසියානු විරෝධී ආකල්ප සහිතව මොස්කව් පාලනය කිරීමේ ප්‍රතිපත්තියක් පවත්වාගෙන යන බව රුසියාව පෙන්වා දී ඇත. ඒ අනුව වොෂින්ටනය මෙවරත්, ට්‍රම්ප්ගේ "පළමුව ඇමරිකාව" යන ප්‍රතිපත්තිය අනුගමනය කිරීම හෝ ඩිමොක්‍රටික් පාක්ෂිකයින් අවධානය යොමු කර ඇති පරිදි "නීති මත පදනම් වූ ලොවක්" පිළිබඳ අදහස අනුගමනය කිරීම හෝ නොව, පැවති ප්‍රතිපත්තීන් නොවෙනස්ව පවත්වා ගැනීමට පමණක් අවධානය යොමු කරනු ඇති බව රුසියාව පවසයි. එනම් එක්සත් ජනපද දේශපාලන භූ දර්ශනයේ මාරුවීම් පිළිබද සැලකීමකින් තොරව එරට ප්‍රතිපත්ති නොවෙනස්ව පවතින බව රුසියානු විදේශ අමාත්‍යාංශය පෙන්වා දී ඇත.
කෙසේවෙතත් රුසියාව, නව ඇමෙරිකානු පරිපාලනය සමඟ ද කටයුතු කරනු ඇති බවත්, එහිදී රුසියාවේ ජාතික අවශ්‍යතා දැඩිව ආරක්ෂා කිරීමට සහ සිය විශේෂ හමුදා මෙහෙයුම් සියල්ලෙහි සියලු අරමුණු සාක්ෂාත් කර ගැනීම කෙරෙහි අවධානය යොමු කරනු ඇති බවත් වැඩිදුරටත් සඳහන් කළේය.
