මේ වසරේ ජනවාරි සිට සැප්තැම්බර් මාසය දක්වා ගෙවුණු මාස 9 තුළ විදේශ රැකියා වංචනික ක්‍රියාවල නිරත වූ පුද්ගලයින් හා බලපත්‍ර රහිත රැකියා නියෝජිතායතනවලට නඩු පවරා වින්දිතයින්ට රුපියල් ලක්ෂ 1056ක් වන්දි වශයෙන් ලබාදීමට කටයුතු කළ බව ශ්‍රී ලංකා විදේශ සේවා නියුක්ති කාර්යාංශය සඳහන් කළේය.

මේ අනුව පසුගිය මාස 9 තුළ විදේශ රැකියා වංචාකරුවන්ට එරෙහිව අධිකරණයේ පවරා ඇති නඩු ප්‍රමාණය 570 කි. එම කාලය තුළ විවිධ පැමිණිලි 3351ක් කාර්යාංශයට ලැබී තිබෙන අතර, ඉන් 1177 කට විසඳුම් ලබාදී තිබේ. තවද මෙම කාලය තුළ කාර්යාංශයේ විශේෂ විමර්ශන අංශය මගින් සිදුකරන ලද වැටලීම් ප්‍රමාණය 19ක් වන අතර, එහිදී පුද්ගලයින් 104 දෙනෙකු අත්අඩංගුවට ගෙන ඇත. ඒ අතර, බලපත්‍රලාභී රැකියා ආයතන 17ක් විය.

ඊශ්‍රායලය, දකුණු කොරියාව, ජපානය, රුමේනියාව, කැනඩාව වැනි රටවල රැකියා ලබාදෙන බව පවසා මුදල් වංචාකිරීම් සිදුවන බැවින් කාර්යාංශයේ විමසීමකින් තොරව එවැනි වංචාකරුවන්ට මුදල් ගෙවීමෙන් වලකින ලෙස කාර්යාංශය මහජනතාවට දැනුම් දෙයි.

තවද, එවැනි වංචනික පුද්ගලයින් පිළිබඳ තොරතුරු කාර්යාංශයේ 1989 දුරකථන අංකයට දැනුම් දෙන ලෙස ද ඉල්ලා සිටී.