තම රටේ යුද හමුදා මෙහෙයුම් අඛණ්ඩව ක්‍රියාවට නංවන බව ඊශ්‍රායල අග්‍රාමාත්‍ය Benjamin Netanyahu පවසයි.
ඇමරිකානු කොංග්‍රසයට ප්‍රකාශයක් ඉදිරිපත් කරමින් හෙතෙම ඊයේ (24) මේ බව කියා සිටියේය.
හමාස් සංවිධානයේ යුද බලය සහ ගාසා තීරයේ ඔවුන් සතුව පවතින පරිපාලන හැකියාව විනාශ කර, ප්‍රාණ ඇපකරුවන් නිදහස් කරන තෙක් යුද හමුදා මෙහෙයුම් අඛණ්ඩව ක්‍රියාවට නංවන බව අගමැතිවරයා එහිදී සඳහන් කළේය. ගාසා තීරයේ සරණාගතයන් යළි පදිංචි කරවීමට ඊශ්‍රායලය උත්සාහ නොදරනු ඇත. එහෙත්, සමස්ත ගාසා තීරයේ ආරක්ෂාව පිළිබඳ පාලන බලය අඛණ්ඩව සතු විය යුතු බවත්, ඉදිරියේදී එම ප්‍රදේශය ඊශ්‍රායලයට තර්ජනයක් නොවන බවට තහවුරු කර ගත යුතු බවත් ඔහු පැවසීය.
ඊශ්‍රායලය සහ ලෙබනනයේ Hezbollah සංවිධානය හා යේමනයේ හූති සංවිධානය අතර පවතින ගැටුම් පිළිබඳව අදහස් දක්වමින් Benjamin Netanyahu පැවසුවේ, තම රටේ උතුරු දේශසීමා ප්‍රදේශයේ ආරක්ෂාව උපරිම අයුරින් යළි සහතික කිරීමට පියවර ගන්නා බවයි. ඊශ්‍රායලයට ප්‍රහාර එල්ල කරන ඕනෑම පුද්ගලයෙකුටම බරපතල ලෙස වන්දි ගෙවීමට සිදුවනු ඇතැයි ද ඔහු කියාසිටී.
