සේවා කාලය නිමවා නැවත ඉන්දියාව බලා පිටත් ව යන ඉන්දියානු මහකොමසාරිස් ගෝපාල් භාග්ලේ මහතා අග්‍රාමාත්‍ය දිනේෂ් ගුණවර්ධන මහතා හමුවෙයි. හමුව අරලියගහ මන්දිරයේ දී පැවැත්විණ.

සිය සේවා කාලය තුළ දෙරට අතර සහයෝගිතාවය වර්ධනය කිරීම සඳහා ලබා දුන් සහයෝගය පිළිබඳව අග්‍රාමාත්‍ය දිනේෂ් ගුණවර්ධන මහතාට ස්තුති කළ මහකොමසාරිස්වරයා ශ්‍රී ලංකාව හා ඉන්දියාව අතර පවතින ඓතිහාසික බැඳීම හා රාජ්‍යතාන්ත්‍රික මිත්‍රත්වය සදාතනික බවද පැවසීය.

දෙරට අතර සුහදත්වය වර්ධනය කිරීමට මෙන්ම රට පත් ව තිබූ අසීරුතම අවස්ථාවේ ඉන් මිදීමට ගෝපාල් භාග්ලේ මහතා දැක්වූ සහාය පෙරළා අගය කළ අග්‍රාමාත්‍යවරයා ලද උපකාර හා සහයෝගය කෘතවේදී ව සිහිපත් කළේය.  අමාත්‍ය විදුර වික්‍රමනායක මහතා  සහ ගෝපාල් භාග්ලේ මහත්මිය ද මේ අවස්ථාවට එක්වූහ.