චීන ජනාධිපති ෂී ජින් පිං මහතා පිලිපීන ජනාධිපති Ferdinand Marcos මහතා හමුවෙයි. එම හමුව ඊයේ (17) පස්වරුවේ තායිලන්තයේ බැංකොක් හිදී සිදුවිය.

චීනය පිලිපීනය සමඟ මිත්‍රත්වය පවත්වාගෙන යාමට කැමැත්තෙන් සිටින අතර, දෙරටේ ජනතාව අතර සහ සංස්කෘතික හුවමාරුව වර්ධනය කිරීමටත්, චීන-පිලිපීන මිත්‍රත්වයේ මහජන මතය තහවුරු කිරීමටත් දෙපාර්ශවය වඩාත් ප්‍රායෝගික ක්‍රියාමාර්ග ගත යුතු බව ෂී ජින් පිං මහතා එහිදී පෙන්වා දුන්නේය. දකුණු චීන මුහුදු ප්‍රශ්නය සම්බන්ධයෙන් දෙපාර්ශවය මිත්‍රශීලී උපදේශනවල නිරත විය යුතු අතර මතභේද සහ ආරවුල් නිසි ලෙස හැසිරවිය යුතුය. චීනය සහ පිලිපීනය යන දෙරටම ආසියාවේ සංවර්ධනය වෙමින් පවතින රටවල් වේ. ඒකපාර්ශ්විකත්වයට සහ හිරිහැරයන්ට එරෙහිවීමට, සාධාරණත්වය සහ යුක්තිය ඒකාබද්ධව ආරක්ෂා කිරීමට සහ කලාපීය සාමය සහ ස්ථාවරත්වය ආරක්ෂා කිරීමට දෙපාර්ශ්වය එක්ව කටයුතු කළ යුතු බව ෂී ජින් පිං මහතා පැවසීය.

චීනය පිලිපීනයේ ජාතික සංවර්ධනයට සහාය සහ උපකාර කරන බවත්, ඒ වෙනුවෙන් සවැදගත් දායකත්වයක් ලබා දී ඇති බවත්, පිලිපීනය සහ චීනය අතර අන්‍යෝන්‍ය විශ්වාසය දිනෙන් දින වර්ධනය වන බවත් Ferdinand Marcos මහතා පැවසීය. සමුද්‍රීය ප්‍රශ්න මත සමස්ත පිලිපීන-චීන සබඳතාව නිර්වචනය නොකළ යුතු බව පිලිපීනය සැමවිටම ප්‍රකාශ කර ඇති අතර දෙපාර්ශවයට මේ පිළිබඳ සන්නිවේදනය තවදුරටත් ශක්තිමත් කළ හැකි යැයි ද හෙතෙම පැවසීය. පිලිපීනය එකම චීනය යන ප්‍රතිපත්තියට අඛණ්ඩව අනුගත වෙමින් ස්වාධීන රාජ්‍ය තාන්ත්‍රිකත්වයේ එල්බ සිටිනු ඇති බවද Ferdinand Marcos මහතා පැවසීය.