ලෝකය විස්මයට පත් කරමින්, 2020 වසරේ චීනය ලැබූ ජයග්‍රහණ
2021-01-20 09:41:56
Share with:

2020 වසරේදී චීනයේ දළ දේශීය නිෂ්පාදිතය සියයට 2.3 කින් වර්ධනය වී යුවාන් ට්‍රිලියන 101. 6 දක්වා වර්ධනය වී ඇතැයි චීනය 18වැනි දා  නිකුත් කළ සංඛ්‍යා ලේඛනවලින් හෙළි වේ. කොරොනා වසංගතය‍ ගෝලීය වශයෙන් ව්‍යාප්ත වී ලෝක ආර්ථිකය බරපතල පසුබෑමකට ලක්ව ඇති පසුබිමක් යටතේ චීනය මෙවන් ආර්ථික වර්ධනයක් අත්කර ගැනීම, අපේක්ෂාව ඉක්මවා යාමක් බව බොහෝ විදෙස් මාධ්‍ය සඳහන් කර තිබේ. කොරොනා වසංගතය ප්‍රථමයෙන් පාලනයට ලක් කර ඇත්තේ චීනයයි. නිෂ්පාදන ක්‍රියාවලිය ප්‍රථමයෙන් යථා තත්ත්වයට පත් කර ඇත්තේ චීනයයි. ආර්ථික වර්ධනය ප්‍රථමයෙන් ධනාත්මක මට්ටමට ගෙන යාමට සමත් වී ඇත්තේ චීනයයි. 2020 වසරේ චීනය ජයග්‍රහණ ලබාගෙන තිබෙන්නේ ලෝකය විස්මයට පත් කරමිනි.

2020 වසරේ ලෝක ආර්ථිකය 4.3%කින් පහත වැටී ඇති බවට ලෝක බැංකුව මේ මස මුලදී අනාවැකි පළ කර තිබිණ. එහෙත් 2020 වසරේ චීනයේ දළ දේශීය නිෂ්පාදිතය සියයට 2.3 කින් වර්ධනය වී තිබේ. චීනය මෙවන් ජයග්‍රහණ ලබාගෙන තිබීමට සාධක කිහිපයක් බල පා ඇත. බිලියන 1.4ක ජනගහණයක් සිටින දැවැන්ත පාරිභෝගික වෙළඳ පොලක් චීනය සතුව තිබේ. 2020 වසරේ චීනයේ අන්තර්ජාල සිල්ලර වෙළඳ ගනුදෙනු ප්‍රමාණය ට්‍රිලියන 11.76 ඉක්මවූ අතර 2019 වසරට වඩා 10.9%කින් වැඩි විය. සීග්‍රයෙන් වර්ධනය වන ඩිජිටල් ආර්ථිකය චීනයේ පාරිභෝගික ප්‍රකෘතියට ප්‍රබල රුකුලක් සපයා  දී ඇත. එමෙන් ම කොරොනා වසංගතයේ බලපෑම අවම කිරීම සඳහා, රජය බදු සහන, ණය අනුපාතික කප්පාදුව සහ සේවා නියුක්තිය ස්ථාවර කිරීම ඇතුළු පියවර රාශියක් ගෙන ඇත. එම පියවර චීන වෙළඳපොලේ ජවය තව තවත් වඩවා තිබේ.

පොදු ඉරණමක් සහිත ජගත් ප්‍රජාවක් ගොඩ නැගීමේ සංකල්පය අනුව චීනය සෙසු රටවල් සමග යහපත බෙදා ගැනීමට කටයුතු කර ඇත. එමගින් ගෝලීය කාර්මික නිෂ්පාදන හා සැපයුම් දාමය ස්ථාවර කිරීම හා ලෝක ආර්ථිකය පුනරුත්ථාපනය කිරීම සඳහා චීනය වැදගත් මෙහෙවරක් ඉටු කර තිබේ.

සබැඳුම
අපි ගැන